រងឆាយ

រងឆាយ ជាឈ្មោះទព្វសម្ភារមួយនៅផ្នែកសំយាបនៃដំបូលផ្ទះ ហើយមានទីតាំងនៅខាងចុងនៃសំយាប។ តាមវចនានុក្រមសម្តេចសង្ឃរាជជួនណាត បានពន្យល់ថា រងឆាយ គឺជាបន្ទះឈើដែលដាក់ស៊ែមលើខ្នងរងស្បូវសម្រាប់ទ្រចុងក្បឿង ត្រង់ទីបំផុតចុងសំយាប។ ផ្អែកទៅតាមអត្ថន័យនៅក្នុងវចនានុក្រមនេះ បានន័យថា មានរងស្បូវហើយបានមានរងឆាយ ព្រោះការវិវត្តន៍នៃផ្ទះគឺដំបូងឡើយ ជាទូទៅដំបូលផ្ទះត្រូវបានប្រកដោយស្បូវ និងត្រូវបានបាំងដោយក្តារមួយផ្ទាំងនៅពីក្រោមចុងសំយាបដំបូលស្បូវនេះ ដើម្បីទប់រងស្បូវកណ្ដប ដែលនៅក្រោមគេបំផុត ឲ្យនៅស្ថិតស្ថេរបានយូរ ហើយក៏ត្រូវបានហៅបន្ទះក្តារនេះថាជា រងស្បូវ។ ក្រោយមកអាស្រ័យនឹងភាពរីកចំរើននៃសង្គម ពេលដែលមនុស្សចេះយកដីដុតឲ្យកើតជាឥដ្ឋ ពិសេសគឺពេលដែលដូនតាយើងចេះធ្វើក្បឿងប្រកដំបូលផ្ទះ ពេលនោះត្រូវតែមានបន្ទះឈើទ្រចុងក្បឿងដែលត្រូវបានតម្រៀបនៅពីក្រោមគេបង្អស់។ ឈើនេះមិនគ្រាន់តែបំពេញនាទីទ្រចុងក្បឿងក្រោមគេបង្អស់នោះទេ ក៏បានជួយបិទបាំងចន្លោះប្រហោងចាប់ពីខ្នងរងស្បូវមកដល់បាតក្បឿងនេះដែរ។

តាមការពិនិត្យជាក់ស្តែងលើលំនៅដ្ឋានដែលមាននៅរវាងដើមសតវត្សទី២០មក យើងក៏ឃើញបន្ទះឈើរងឆាយ ពុំមានជាប់នឹងរងស្បូវដែរ គឺគេបានដាក់ពីលើផ្លាន ឬស៊ែមជាប់ពីក្រៅផ្លានតែម្តង។ ទាក់ទងដល់ទឹកភ្លៀងដែលហូរពីខាងលើមក និងស្រក់ចុះចេញពីចុងសំយាបក្បឿង ចំពោះដំបូលដែលមានតែរងឆាយនេះ គេអាចធ្វើទត្រង់ទឹកភ្លៀងក៏បាន ឬក៏មិនធ្វើក៏បាន ទៅតាមការចង់ដាក់ឬមិនចង់ដាក់របស់ម្ចាស់ផ្ទះ។

នេះជារបកគំហើញ បំពេញបន្ថែមលើការពន្យល់អត្ថន័យនៃពាក្យរងឆាយរបស់សម្តេចសង្ឃរាជ ជួន ណាត បោះពុម្ពកាលពីឆ្មាំ១៩៦៧ ហើយដែលបច្ចុប្បន្នពុំឃើញមានគេនិយមប្រើ ដោយមូលហេតុប្រហែលកើតឡើងពីកត្តាច្រើនយ៉ាង។

រូបភាពៈ រងឆាយនៅពីលើផ្លាន និងសរសៃដែកសំរាប់ទ្រទទឹកភ្លៀង

អត្ថបទ “ទាក់ទងលំនៅដ្ឋាន”៖

១.	អ្វីទៅហៅថារត ?
២.	រងស្បូវ
៣.	រងឆាយ
៤.	មករនៅក្នុងសំណង់លំនៅដ្ឋាន
៥.	ក្ដារបែននៅក្នុងសំណង់លំនៅដ្ឋាន
៦.	ដៃស្នា និង ដៃស្វា
៧.	តើក្របជាអ្វី?